Real Madridi mbrëmë ka shënuar fitore me rezultat minimal 1-0 ndaj Juventusit në kuadër të rrethit të 1/8 së finales në Kupën e Botës për Klube.

Golin e vetëm në këtë sfidë e shënoi Gonzalo Garcia, shkruan Arbresh.info.

Pas ndeshjes, trajneri i Real Madridit, Xabi Alonso, vlerësoi lart performancat e fundit të sulmuesit 21-vjeçar.

“E njihja Gonzalon më parë, por do të gënjeja nëse do të thoja se prisja që ai të shënonte 3 gola në 4 ndeshje,” u shpreh Alonso për mediat pas ndeshjes së fundit.

“Ai i lodh mbrojtësit, bën presion, punon shumë dhe ndihmon ekipin. E ka një shpirt gare që më pëlqen”.

“Unë i besoj atij,” përfundoi Alonso, duke lënë të hapur mundësinë që Garcia të bëhet pjesë e rëndësishme e skuadrës në të ardhmen.

Gonzalo ka shënuar tre gola dhe një asistim në katër ndeshjet e para të Realit në Kupën e Botës për Klube.

Sfidën e radhës madrilenët e luajnë me 5 korrik ndaj Dortmundit në çerekfinale./Arbresh.info